يوم الخميس 5/6 كان بالنسبة لأي حد يوم عادي بيجي بعد الأربع وبعده
هيجي الجمعة لكن بالنسبة لنا احنا كان حاجة
special
جدااا
احنا ؟؟احنا مين؟!..احنا طالبات امتياز
ليه ؟؟
كانspecial؟؟
هو دا السؤال الصح
عشان حاجات كتير أوي حصلت في اليوم دا بس قبل ما أحكيلكم عليها
نقرا "قل أعوذ برب الفلق" عشان مش عايزين حسد...خلصتم؟؟...طيب
نقول الأذكار احتياطي..خلاص خلاص بأهزر والله هأقول والأمر لله...
special كان يوم الخميس
لانه كان اليوم اللي بنات كتير من دفعتنا اتفقوا يتغدوا فيه مع
بعض وفعلا الحاضر كان بيعلم الغايب وقلنا لأكبر عدد عرفنا نوصله
لبنات دفعتنا واتصلنا بالوطنية وحجزنا الوجبات وبفضل الله اتجمعنا
يوم الخميس الساعة 2ونص في المطعم
وبدأنا بتزيين الكراسي بالبالونات وكان معظم الحاضرات بيزينوا
الكراسي عملا بمبدأ (كل واحد يعمل بلقمته)..ههههه..
وبدأنا بفقرات الغدا وأول فقرة كانت تعارفنا على بعض فأما ثاني
فقرة فكانت تالت أكتر الفقرات اثارة في اليوم لأن اول وتاني
الفقرات اثارة كانتالغدا
وهذه الفقرة هي المسابقات وعملنا فريقين ولما طلبت من كل فريق
يختار اسم اختاروا هذه الأسماء الفريق الأول{عايزين ناكل} والفريق
التاني{ عايزين ناكل-(شرطة)}وبعد معركة قتالية بين الفريقين
فاز
الفريق الأول عايزين ناكل (من غير شرطة)
وكان السؤال الفاصل هو
(بنت........غالية ولو كانت جارية؟؟اكملي المثل بكلمة من التالي-
1-الأكابر 2-الذوات 3-الحسب)
وحصلت كل متسابقة من الفريق على ربطة شعر(توكة) بالطبع ناهيك عن
الخلافات على لون التوكة ..وبعدها كانت كلمة بسييييييطة عن تعريف
الاخوة في الله وحق المسلم على المسلم وطلبت الحاضرات اعادة هذهالكلمة
ثانية بعد الغدا لانها كانت قبل الغدا مباشرة وكان الجميع (مهيّس)
طبعا ..
وطبعا الفقرة الاهم في اليوم كله الغـــــــــــــــــــدا
وكانت مكونة من سندوتش كفتة وآخر حواوشي وبطاطس تايجر بالباربكيو
وسلطة خضرة ومخلل أما الحلو فكان عصير بست تفاح وفشار
والحمدلله ان الاكل عجب الكل ولم يعترض عليه أحد بل على العكس قالولي
تسلم ايديكو .. مش عارفة على ايه الحقيقة لاننا مش اللي عاملينه
ولا اللي جايبينوه لانه كان دليفري يمكن عشان حطناه على الطربيزات
ماهو مش أي حد يحط برده..ماهو الاكل ايه غير نفس..وأثناء شرب
العصير اتفقنا على التعاون على طاعة مع بعضنا ننال شرف الأخوة في
الله كانت الطاعة هي صلاة الفجر وأخذنا أرقام موبيلات بعض ومن يومها
والحمدلله بنرن على بعض الفجر نصحي بعض للصلاة واللي تصحى ترن عشان
تعرف الباقي انها صحيت او تكنسل ...وانتهى اليوم بأخذ العديد من الصور
الجماعية الفكاهية الهزلية جدااا...
وطلب الجميع تكرار هذا اليوم الرائع وخاصة في رمضان
..وبألف هنا وشفا
Comments (0)
إرسال تعليق